Festungsmusée: Originell Iddi, fir den Defizit ze decken

1. Abrëll: Kultur fir d'Bevëlkerung op maachen a si och nach finanzéieren. Dat ass den neie Projet vum Octavie Modert, fir dem Festungsmusée ze hëllefen.

E Stéck vum Gléck: Fir Liebhaber sécher eng Geleeënheet à saisir - si kënne sech quasi an d'Dräi Eechelen akafen.

Eng drëtt Rallonge ass néideg, fir datt de Projet vum Festungsmusée op den Dräi Eechele ka realiséiert ginn. Dat sot d'Statssekretärin am Kulturministère, d'Octavie Modert, jo e Méindeg virun där zoustänneger Chamberkommissioun. Offiziell geet et ëm bal 9 Milliounen Euro, déi feelen.

RTL-Informatiounen no läit dee Montant awer nach méi heich an dofir gëtt et elo eng nei Idee fir de Finanzement. Nämlech, datt Privatleit hei zu Lëtzebuerg sech souzesoen e Stéckelche Festungsmusée kënne kafen ...

"Eng gutt Iddi"

Et gin eng ganz Partie Méiglechkeeten, sou war um Bord vun där Chamberkommissioun ze héieren. Et kann een zum Beispill Parrain vun engem ganze Sall ginn, da kënnt den Numm vun der Fra oder vum Mann goldgerummt an Aenhéicht bei d'Entréesdier vum Sall hänken. Wee wëll, kann awer och just nëmmen een Träpplek parrainéieren oder eng Vitrine oder eng vun de sëllege Sëtzgeleeënheeten am Musée. D'Octavie Modert schwëtzt op alle Fall vun enger gudder Iddi ...

Am Ausland ginn et esou oder ähnlech Saachen. D'Frauenkirche zu Dresden, Kulturobjeten an Italien oder, wa mer ee Beispill aus dem Sport huelen, d'Arena op Schalke.

Iert een hei elo d'Iddi hat, fir u Privatleit erunzetrieden, hunn d'Responsabel vum Festungsmusée bei de groussen Nimm aus der Wirtschaft ugeklappt, ouni Erfollg, esou d'Kultur-Statssekretärin am RTL-Interview.

En neie Wand

De Projet, fir Propriétaire vun engem Stéck Festungsmusée ze ginn, soll elo an de nächsten Deeg offiziell virgestallt ginn, ënnert anerem ass nach ze klären, wat wéivill kaschte soll.

D'Formulaire fir d'Demande kann een dann am Kulturministère ufroen an ausgefëllt dohinner zeréckschécken.

Fir de Festungsmusée, ma am Prinzip och all di aner Muséeën an Zukunft nach méi mat Liewen ze erfëllen an zu Plazen ze maachen, wou d'Leit sech begéinen, denkt d'Kulturstatssekretärin och driwwer no, fir méi wéi jee kulturell Manifestatiounen an de Muséen ze organiséieren ...

Et gesäit also ganz duerno aus, wéi wann ee fresche Wand duerch d'Lëtzebuerger Muséesszeen géif blosen.

Ween intresséiert ass oder ganz einfach méi Informatiounen zum Thema wëll hunn, ka sech op der Telefonshotline mellen um 26 68 47 47.

Dir hutt et, wéi onschwéier aus de Commentairer hei drënner ze erkennen ass, gemierkt, datt dat hei eise "Poisson d'avril" ass ... :-)

Är Commentaire

D'Commentairer gi gelueden, ee Moment w.e.g.!